திருமணத்திற்குப் பிறகு திரையுலகிலிருந்து விலகி குடும்ப வாழ்க்கையில் கவனம் செலுத்தி வரும் நடிகை ஷாலினி, தனது பிள்ளைகள் குறித்து சுவாரஸ்யமான தகவல் ஒன்றை விருது விழா மேடையில் பகிர்ந்துள்ளார்.
‘காதலுக்கு மரியாதை’, ‘அலைபாயுதே’ போன்ற காவியப் படங்களின் மூலம் இன்றும் ரசிகர்களின் கனவு நாயகியாகத் திகழும் அவர், இதுவரை தனது பிள்ளைகளான அனோஷ்கா மற்றும் ஆத்விக் ஆகியோர் தனது எந்த ஒரு படத்தையும் முழுமையாகப் பார்த்ததில்லை என்று தெரிவித்துள்ளார்.
இந்த நிகழ்ச்சியின் போது தனது பிள்ளைகளிடம் ஒரு ஜாலியான கோரிக்கையையும் அவர் முன்வைத்தார். “தயவுசெய்து என்னுடைய படங்களில் ஒன்றையாவது முழுமையாகப் பாருங்கள்” என்று அவர் கேட்டுக்கொண்டது அங்கிருந்தவர்களை நெகிழ்ச்சியில் ஆழ்த்தியது.
மேலும், தனது மகள் அனோஷ்கா அண்மையில் நண்பர்கள் மூலமாக ‘அலைபாயுதே’ படத்தின் சிறப்புகளைக் கேட்டறிந்து, தன்னுடன் இணைந்து அந்தப் படத்தைப் பார்க்க விருப்பம் தெரிவித்ததாகவும், ஆனால் அது இன்னும் நிறைவேறவில்லை என்றும் ஷாலினி அந்தப் பேட்டியில் குறிப்பிட்டுள்ளார்.
