தமிழ் சினிமாவின் முன்னணி நடிகர்களில் ஒருவரான சிவகார்த்திகேயன் தற்போது தனது 26வது திரைப்படமான சேயோன் படத்தில் நடித்து வருகிறார். இந்த படம் ராஜ்கமல் பிலிம்ஸ் இன்டர்நேஷனல் மற்றும் டர்மரிக் மீடியா இணைந்து தயாரிக்கும் படமாகும். வரும் அக்டோபர் மாதம் இப்படம் திரையரங்குகளில் வெளியாகும் என அதிகாரப்பூர்வமாக அறிவிக்கப்பட்டுள்ளது.
இந்த படத்தை கமல் ஹாசன் தயாரிக்க, இயக்குநர் சிவகுமார் முருகேசன் இயக்கி வருகிறார். மேலும், படத்திற்கு சந்தோஷ் நாராயணன் இசையமைக்கிறார். சமீபத்தில் வெளியான படத்தின் பர்ஸ்ட் லுக் போஸ்டர் ரசிகர்களிடையே பெரும் வரவேற்பைப் பெற்றதுடன், படத்தின் மீதான எதிர்பார்ப்பையும் அதிகரித்துள்ளது.
இந்நிலையில், நடிகர் சிவகார்த்திகேயன் இன்று தனது 41வது பிறந்தநாளை கொண்டாடி வருகிறார். இந்த சிறப்பு நாளை முன்னிட்டு, திரையுலக பிரபலங்களும் ரசிகர்களும் சமூக வலைதளங்களில் அவருக்கு வாழ்த்துகளை குவித்து வருகின்றனர். இதனை கொண்டாடும் விதமாக, ‘சேயோன்’ படக்குழு ரசிகர்களுக்கு ஒரு ஸ்பெஷல் வீடியோவை வெளியிட்டுள்ளது.
வெளியான அந்த வீடியோவில், சிவகார்த்திகேயன் இதுவரை பார்த்திராத மிரட்டலான மற்றும் வித்தியாசமான தோற்றத்தில் தோன்றுகிறார். இந்த புதிய லுக் மற்றும் காட்சிகள், அவரது திரைப்பயணத்தில் ‘சேயோன்’ ஒரு முக்கியமான மைல்கல்லாக அமையும் என்ற நம்பிக்கையை ரசிகர்களிடையே உருவாக்கியுள்ளது. பிறந்தநாளில் வெளியான இந்த ஸ்பெஷல் வீடியோ, ரசிகர்களின் கொண்டாட்டத்தை மேலும் இரட்டிப்பாக்கியுள்ளது.
